Skal gi sjøauren ein sjanse
Så mange som mogleg av sjøaurebekkane i Vindafjord skal under lupa for å ta vare på bestandane. Vasskoordinator Sven-Kato Ege har god støtte i arbeidet hos Tore Skogen og Nicolai Bastlien i Vindafjord jakt- og fiskelag.
Målet er å få mange fleire med på laget, og gjerne grunneigarane som har kunnskap bakover i tid om elvar og bekkar i distriktet. Sven-Kato Ege er koordinator i Haugaland vannområde som drar i gang kartlegginga i Vindafjord saman med det lokale jakt- og fiskelaget.
Det er ein jobb for fleire sidan det med utgangspunkt i kart er over 100 potensielle bekkar og elvar der det er sjøaure.
Ege meiner sjøauren er eit forsømt kapittel i forvaltninga. Bekkar kan bli betydeleg påverka av fysiske inngrep som kan gjere det vanskeleg for sjøauren å overleve.
