Sju veker med innsyn: — Må nedprioritera andre oppgåver

Under orienteringa i kommunestyret tysdag gjorde kommunedirektør Åsmund Andersen Sekse greie for omfanget av innsynskrava som kommunen arbeider med. Desse krava skil seg frå det kommunen vanlegvis opplever, fortel Sekse, og legg til at kommunen jamleg får innsynskrav, men at det i dette tilfellet handlar det om langt meir omfattande førespurnader.

Sekse viste til konkrete døme der det blir bedt om full tilgang til dokument, e-postar, møtereferat, notat, kalenderføringar og all elektronisk kommunikasjon over lengre tidsperiodar. I eitt tilfelle gjaldt kravet alt materiale knytt til strategisk leiargruppe mange månadar tilbake i tid.

— Dette er svært omfattande arbeid, og det tar tid å finna fram all informasjonen, forklarte han.