Pris- og pengedryss til verdige vinnarar

I mange år har Etne kommune delt ut kultur- og frivilligprisen, men i år blir det skrive eit nytt kapittel. For første gong skal kommunen også dela ut både stipend til unge talent og eigne heidersprisar til personar som har markert seg på høgt nivå.

Bakgrunnen er eit lenge uttrykt ønske frå kommunestyret om å løfta fram dei som legg ned ein ekstra innsats – enten det handlar om å bli norgesmeister, hevda seg internasjonalt, eller bidra sterkt i lokalsamfunnet.

Ved inngangen til året blei innbyggjarane inviterte til å spela inn kandidatar til dei nye prisane og søka om stipend. Seinare på våren gjorde formannskapet sine vedtak: Kven som skulle bli dei aller første mottakarane.