Rabinowitz til rogalendingane

Forfattaren av årets bok er Arne Vestbø, som gav ut boka Øverst på nazistenes liste» for første gong i 2014. Boka formidlar ei sterk forteljing om Moritz Rabinowitz, ein polsk-jødisk innvandrar som kom til Haugesund i 1901. Heile handlinga startar i heimbyen Rajgrod i Polen, Rabinowitz er 14 år gamal og skal reisa heilt åleine til Bergen for å jobba hos onkelen. Ei reise over havet som tar mange dagar og inkluderer fleire byte av skip. Vel framme i Bergen blei han plassert på hotell av onkelen, for det var ikkje plass for han i heimen deira. Her budde han åleine, med ei ølkneipe rett utanfor døra og eit språk han ikkje kjente. Men Rabinowitz hadde ein ukueleg optimisme og eit imponerande pågangsmot, og han jobba seg opp og fram.

Etterlyst av tyskarane

Han starta opp fabrikkar og butikkar i Haugesund, Stavanger, Sauda, Egersund og Kristiansand. Han blei ein kjent person i den nye heimbyen Haugesund der han dreiv både klesbutikk og klesfabrikk, og mens han imponerte kundane sine, irriterte han konkurrentane. Rabinowitz var også tidleg ute med å forstå verdien av skikkeleg annonsering i aviser, og han nytta seg hyppig av retten til å skriva lesarinnlegg i dei same avisene.