Populært med festival

Åtteåringen starta dagen med ein tur til Øktaren. Deretter gjekk turen til kaien i Sandeid, der han kikka på kongekrabbe, ål, torsk, sjøstjerner og alt det andre som var å sjå i fiskekummen.

— No skal me sjå på båten, ete bolle og is, fortel åtteåringen til Grannar.

Klovneshowet i teltet fekk han også med seg. Han blei til og med plukka opp på scenen, då den danske klovnen Ray Speedy laga show.

Variert program

Det var mange forskjellege aktivitetar under arrangementet i Sandeid. I samtalen om fiske og kvalfangst mellom Nils Tokheim, Kåre Heggebø, Øystein Helgeland og Nils Vestbø, var det omlag 140 personar som samla seg i teltet på kaien.

— I år var dette eitt av høgdepunkta for meg, fortel Eivind Jøsendal.

Han hadde teke turen frå Odda til Sandeid denne helga, for å vere med på Kystkulturdagane.

— I barndommen budde eg nokre år i både Ølen og Sandeid, og for nokre år sidan arva eg huset til grandtanta mi i Sandeid. Sidan ho heitte Signe, kallar eg det berre Signehuset. Eg har til og med sett opp skilt der det står Signehuset, fortel Jøsendal.

— Korleis er det å gå på festival utan restriksjonar?

— Dette er den første festivalen eg går på etter nedstengingane, og det er veldig kjekt. God stemning og god mat, og så er det kjekt å prate med gamle klassekameratar. Ungdomstida her var heilt fantastisk, med Hårek, Frankie Boy og bygdedansar, seier Jøsendal.

Fekk måling i fjeset

— Eg synest det blei kult! seier Olene Larsen (9) frå Sandeid.

Ho har akkurat sett seg sjølv i ansiktet, etter å ha blitt måla som ein sommarfugl. Dette var ein av aktivitetane for barna denne dagen.

— Kva anna har du gjort på kystkulturdagane?

— Eg har kjøpt slikkepinne, og så måtte stå lenge i kø for å få ansiktsmåling, fortel niåringen.

Når ho ser resultatet konkluderer ho med at det er verdt det.

— No skal eg snart på klovneshow! seier Larsen.

Øktaren opp

Øktaren 575 er også ein del av programmet på Kystkulturdagane. Løpet er totalt 5,5 kilometer, og startar frå Sandeid sentrum. Målgang er på Øktaren 575 moh. I år var det 90 påmelde deltakarar, der 17 av desse konkurrerte om å vere raskast opp til fjelltoppen.

Tobias Aarekol (17) frå Ølen sette ny løyperekord, med tida 29.19. Lilly Øren (12) frå Etne var raskast av både jenter og damer, og fekk premie for ny løyperekord for jenter/damer på tida 37.56. I klassen for gutar fødd 2005 eller seinare var det ingen deltakarar. Lilly Øren var også med i 2019, som 9-åring. Den gong fekk ho tida 39.31. Les meir om løpet her:

Fleire hundre besøkande

Søndag føremiddag opplyser Svanhild Selvaag til Grannar at arrangørane er svært godt nøgd med arrangementet.

— Arrangementet har gått som planlagt, og me har vore heldige med vêret. Det var bra med folk både på dagtid og kveldstid. Dei som skulle på fjordcruise stod ein halvtime i kø for å komme med, sidan det berre var plass til hundre personar. Me selde rundt 580 billettar til kveldsarrangementet, seier Selvaag.