Metalldetektoren avslørar meir enn gamle skattar

— Eg finn mykje skrot når eg er ute med metalldetektoren, seier Jan Terje Rafdal.

For blant gamle myntar, gullringar og andre fortidsminne som ligg gøymt i jorda dukkar det rett som det er opp både plastrestar, gamle flaskekapslar, brukte sauemerke, blyrestar og ikkje minst brukte gravlykter.

— Kvar gong eg er ute har eg veska full med søppel som eg har plukka opp. Eg plukkar søppelet som ein liten gest til grunneigaren som gjev meg lov til å leita på eigedomen hans, og for å ta vare på nærmiljøet, seier den ivrige skattejegeren frå Etne.