Når heimekos blir til små, søte draumar

Heime hjå Rannveig Mørk i Vikedal er det lett å kjenna seg vel. Kaffidufta ligg i lufta og heimelaga cookies freistar frå bordet. Det er her, i det rolege heimekjøkkenet, ho driv Instagram-kontoen «reine.fristelser», der ho deler og lagar søte freistingar.

Rannveig kjem opphavleg frå området utanfor Sauda, men har budd i Vikedal dei siste 14 åra. Ho har to born og ein sambuar som jobbar offshore. Til dagleg arbeider ho som helsefagarbeidar i 60 prosent stilling ved Haugesund sjukehus – ein jobb ho trivst svært godt i.

— Eg har alltid likt å vera på kjøkkenet. Som lita jente var eg ofte med mamma når ho baka. Det er noko heilt eige med det, seier ho.