Opna bru bygd av Etne-firma
Samferdselsminister Jon-Ivar Nygård (Ap) klipte tysdag snora på ei bru bygd av Etne-bedrifta Brødrene Flatebø i Seljestad. E134 var eitt av hovudfokusa under besøket hans i Ullensvang og Vinje.
Besøket varte frå morgonen til ettermiddagen.
Tett program
Annonse
I løpet av dagen tok samferdselsminister Jon-Ivar Nygård (Ap) det første spadestikket for Nye Veier-prosjektet på Rv13 Odda–Tyssedal, klipte snora for brua i Seljestad, fekk orientering om prosjektet E134 Røldal–Seljestad og deltok på ein demonstrasjon av skredtårn på E134 Haukelifjell i regi av Statens vegvesen.
Nygård var også på eit bedriftsbesøk hos bilverkstaden Paulsen AS i Odda, før han hadde eit møte med næringslivet i regionen.
Førebuing til tunnel
I april i fjor blei det kjent at Brødrene Flatebø var blitt tildelt ein kontrakt verdt ti millionar kroner. Kontrakten inneber konstruksjon av ei ny bru over elva Opo, like aust for Seljestad, og riving av ei eksisterande bru samt fleire bygningar. Brødrene Flatebø hadde ikkje representantar til stades under bruopninga tysdag.
Annonse
Statens vegvesen, som står bak utlysinga av entreprisen Etne-firmaet vann, har planlagt arbeidet som ein del av førebuingane før hovudentreprisen for den nye Røldalstunnelen blei lyst ut i 2024. Dei fire leverandørane som er kvalifiserte til å levere tilbod er AF Gruppen Norge AS, Hæhre Entreprenør AS, JV Røldalstunnelen Metrostav Norge AS og Bertelsen & Garpestad AS, og JV Leonhard Nilsen & Sønner AS og Obrascòn Huarte Lain, S.A. Dei kvalifiserte entreprenørane hadde tida fram til 31. januar i år på å levere endeleg tilbod på kontrakten, og det vil bli tildeling av entreprise og kontraktinngåing i mars.
— E134 Røldal-Seljestad har forventa anleggsstart mot sommaren og er ein del av den viktige aust/vest-forbindinga i Noreg. I dag opna vi ei lita bru som skal bere store lass gjennom bygginga av prosjektet, seier samferdselsminister Jon-Ivar Nygård (Ap) i ei pressemelding.
