Slik ser arkitekten ut at nybygget til Omega 365 vil ta seg ut i Ølensvåg. Dagens bygningsmasse i framgrunnen.ILLUSTRASJON: OMEGA 365
Næringsliv
Omega set nye rekordar – og vil bygge nytt i Ølensvåg
Omega 365 Gruppen passerte ein ny milepæl i fjor, då selskapet for første gong omsette for meir enn 3 milliardar kroner. Og no går det truleg mot bygging av eit nytt kontorbygg i Ølensvåg.
Omega 365 Gruppen leverte 3,2 milliardar kroner i salsinntekter i 2023, noko som er ein auke på heile 700 millionar kroner samanlikna med 2022.
– Vi har produkt og tenester som treff godt i marknadene vi er i, konstaterer konsernsjef Petter Aalvik fast.
Omega 365 driv innan forretningsområda programvareløysingar, prosjektpersonell, IT-konsulentar, ingeniør- og arkitekttenester, subsea-tenester, og design og kommunikasjon. I høve til økonomisk rapportering har dei delt desse i tre sektorar: programvare, konsulenttenester og subsea. Og det er god vekst i alle tre.
