Nytt regelverk kan få følgjer for lokale bønder

I eit eventuelt nytt regelverk vil det tidlegare minstekravet om spreieareal bli erstatta av ei fosforgrense som skal gjelde for alle gjødselslag. Bakgrunnen for det nye regelverket er mellom anna å unngå for høgt fosfornivå i jord og vatn.

Etter dagens reglar er det tillatt med 3,5 kilo fosfor per dekar. Denne vil bli redusert til 2,3 kilo over heile landet med unntak av Rogaland der grensa er sett til 2,7 kilo fosfor per dekar. Grensa er redusert inn til eit nivå som ligg nær eit typisk behov og opptak i avlingar, men geografisk er det skilnader i avlingar og med høgare avlingar i Rogaland blir ikkje krava like strenge her som elles i landet.

— I det nye regelverket går ein direkte på fosfor og ein reknar ut kor mykje fosfor kvart dyreslag produserer. Alle vil få eit større krav, men det vil slå ulike ut på dei ulike dyreslaga. Gjødsla skal spreiast på eit større areal og fosforkravet gjeld enten det husdyrgjødsel eller handelsgjødsel. Areal vil bli ei utfordring, og mange bønder vil bli berørt av dette, seier rådgjevar Håkon Pedersen i Norsk Landbruksrådgjeving.