Nissar i gamleskulen

— Er det nokre snille barn her, spør nissefar og gløttar på døra inn til skulestova.

Han er ute på sin vanlege førjulsrunde og har lagt vegen innom gamleskulen i Ølmedal denne morgonen. Og til alt hell for den reisande nissen er stova full av skuleungar. Dei har tatt turen frå skulehuset litt lenger nede i dalen for å læra korleis skuledagen var for ungane før i tida, og for å kosa seg litt ekstra i adventstida.

— Kvar måndag i desember har me adventsamling. Vanlegvis brukar me å halda til i lavvoen ved skulen, men i dag skal me bruka det gamle skulehuset i bygda, fortel lærar ved skulen, Bodil Imsland og er glad for at nissefar har tatt seg tid til å helsa på.