Mange kjøparar – lite til sals

Landbrukseigedomar og småbruk er i vinden som aldri før og folk står i kø for å vera med i kampen om dei få eigedomane som er for sal. Eigedomsmeklar Vidar Opheim i Eiendomsmegler A har opplevd stor auke dei siste to åra. Tilgangen på store og mindre bruk som vert lagt ut for sal i distriktet vårt, er svært avgrensa. Folk som ynskjer å satsa på landbruk eller ynskjer seg litt større tomteplass, må difor leita lenge på marknaden for å finna det dei er på jakt etter.

Interessa er aukande og kampen om å sikra seg draumegarden er svært stor, konstaterer meklarane.

— Me opplever ei kjempestor interesse for gardsbruk og etterspurnaden er stor. Ofte ser me 40 interesserte når ein gard blir lagt ut for sal, og dei som melder si interesse kjem både frå nabokommunar og enda lenger vekk. Me har hatt bod på gardar i distriktet heilt frå Hamar, Jæren og Nord-Hordland, fortel eigedomsmeklar Vidar Opheim i Eiendomsmegler A som nyleg avslutta salet av ein større gard i Ølensvåg.