Litt vemodig med snorklipping

Bygginga av Espelandssvingane har vore veldig teknisk utfordrande, men sluttresultatet blei svært bra meiner byggeleiaren for prosjektet, Roberto Balzer. Frå dei travle fasane med graving og sprenging, til ferdigstilling og opning av vegen, har han fått mange nye kjenningar. Både kollegaer, folk på butikken og grunneigarar. — Å ta farvel med desse nye kjenningane blir vemodig. Det er alltid slik, seier 46-åringen. For 20 år sidan kom han flyttande frå Tyskland til Stord med kona si, Silke, og her har dei blitt verande. Som ein hyllest til sitt nye heimland, gav dei sonen sin namnet Erik, etter Eirik Raude.

— Kva er di sterkaste side?

— Eg kan tilpassa meg mange forskjellige utfordringar. Eg er veldig glad i å snakka med folk og likar å ha eit øyra ope for alle som har noko å seie.