Litt av ein breiflabb

Hobbyfiskaren Ingbert Markhus har drive med fiske i Åkrafjorden heilt sidan 2002. Etter at han slutta som styrmann på ferja mellom Skånevik og Utåker i 2006, har denne interessante og matnyttige geskjeften vorte intensivert. Det finst snautt tal på alle dei fiskestampar med torsk, lyr, sei, lange og brosme som har vorte sende til formidlingssentralen Fjordfisk i Skånevik.

Fangsten kan sjølvsagt variera frå tid til tid, uttrykkjer Ingbert.

— I dag fekk eg fylt heile to stampar med stort sett berre lyr og sei. I går fekk eg betydeleg meir av den slags på garna mine. Det som likevel auka vekta til gagns i dag, var ein breiflabb på nesten 60 kilo, seier den lune og lågmælte, men tydeleg begeistra fiskaren.