Klart for nytt folkemøte

Som ved dei to førre folkemøta kjem dagleg leiar Jørgen Jorde i Windafjord Port. Temaet for kvelden blir status for planane på Dommersnes industriområde.

Fjerde møte

Planane om ei storskala utviding av industriområdet på Dommersnes blei for første gong presentert av kommunedirektør Yngve Folven Bergersen under eit kommunestyremøte 25. oktober 2022. I februar året etter inviterte Vindafjord kommune og Westcon til eit informasjonsmøte for å fortelje meir.

På det første møtet var dei fleste som tok mikrofonen positive, mens i praten mellom folk på gangen var skepsisen større. Dette bana veg for ei underskriftskampanje mot planane som per 12. juni 2024 har 773 signaturar. Med utgangspunkt i oppropet blei foreininga Bevar Ålfjordens perle oppretta i januar 2024.

Sidan det første møtet har det blitt arrangert to folkemøte til. På det førre møtet 20. mars i år delte Windafjord Port og Bevar Ålfjordens perle scenen. Slik blir det ikkje neste veke. Styreleiar Jon Magne Svendsbøe i Bevar Ålfjordens perle skriv i ein mail, som også er delt av gruppa på Facebook, at Windafjord Port var tydelege på at dei ikkje ønska å dele møtet med dei denne gongen. Til Haugesunds Avis, som var først til å omtale saka, seier Jorde at det ikkje er tanken å halde eit debattmøte nå, men at dei gjerne tek imot ein invitasjon om Bevar Ålfjordens Perle vil arrangera eit nytt møte der dei informerer om sitt arbeid.

Klagebehandling drar ut

Vindafjord kommune og Westcon seg kvar sin halvdel av Dommersnes AS/Windafjord Port som blei stifta 5. mai 2023 med formål om å utvikle heile det over 500 mål store industriområdet på Dommersnes til potensiell serieproduksjon til havvindnæringa.

15. april vedtok eit fleirtal i Utval for drift, utvikling og kultur (DUK) å oppretthalde selskapet sitt byggeløyve til fase 1. Denne delen av utbygginga omhandla utsprenging av eit samla område på 54 dekar innanfor det tidlegare nytta området på Dommersnes. I eit Facebook-innlegg skriv Bevar Ålfjordens perle at det siste om klagene på byggeløyvet for fase 1 er at saka nyleg er hamna på bordet til juridisk seniorrådgjevar Odd-Arild Holen hjå Statsforvaltaren i Rogaland. Det første han skal ta stilling til er ifølgje foreininga om Rogaland er inhabil og må senda over til settestatsforvaltar. Foreininga skriv at klagesaka ikkje blir avgjort innan folkemøtet neste veke. Holen seier til Haugesunds Avis at dei vil starte sakshandsamninga i midten av juni.

Det er skissert tre fasar av bygging i selskapsavtalen mellom Westcon og kommunen. Fase 2 legg opp til å ta enda meir areal i bruk, mens fase 3 vil krevje alle dei over 500 måla som regulerte til industri og at Vikevegen blir lagt om. For fase 2 og 3 er det starta ein prosess med ny reguleringsplan.