Klar for nye hyss» i helga

I dag går startskotet for årets Pippifestival i Skånevik. I fire dagar til ende blir det show og moro for store og små med minisirkus, bondesafari, ulike aktivitetar i Pippiteltet, festivalparade i sentrum og ikkje minst teaterframsyninga Emil i Lønneberget som tilbyr seks førestillingar i løpet av festivalen.

— Astrid Lindgrens verden fenger like mykje for barn som for vaksne, seier leiar for Skånevik Teater, Theresa Tungesvik Hereide som sist hadde Emil sine sprell på plakaten i 2012.

Som vanleg står lokale namn på rollelista. Skåneviksjenta Live Serine Eljarvik (7) har rolla som vesle Ida medan Håvard Gilje Kausrud (9) frå Bømlo skal spela Emil. Dei to unge skodespelarane får følgje av to Etnebuar på scenen, medan resten av rollelista består av amatørar og profesjonelle skodespelerar frå mange ulike kommunar.