Karmøy: Mindreårig gut tiltalt for vald mot utviklingshemma mann

Ein mindreårig gut er tiltalt for å ha slått ned utviklingshemma Tor Inge Dahl på Karmøy i fjor sommar. Etter overfallet treng 59-åringen hjelp til alt.

– Han har ikkje noko liv lenger. Det er totalt forandra. Han kan ikkje ete sjølv eller bruke hendene eller kroppen til noko. Han er avhengig av hjelp døgnet rundt, seier bror til mannen, Martin Dahl, til NRK.

Ifølgje tiltalen vart 59-åringen slått i bakken med knytt neve av den mindreårige guten. Han vart påført fleire brot i ansiktet og i hovudskallen og fekk ei bløding i hjernen. Ifølgje tiltalen er Dahls medisinske invaliditet rekna til 75 til 100 prosent.

Valdsepisoden vart filma, og videoen vart delt i sosiale medium.

Guttens forsvarar, advokat Christina Winsor, ønskjer førebels ikkje å kommentere tiltalen.

Rettssaka mot guten startar i Haugaland og Sunnhordland tingrett 13. mars, og det er sett av tre dagar til saka.

(NTB)