Maskinførar Jarle Vik (t.v), leiar i Sjøkanten Trivsel, Heidi Wannberg, byggeleiar Frederic Bull-Tornøe og dagleg leiar Vigor Bygg, Kjetil Nedreskår, er i full sving med byggearbeidet på det nye utebassenget i Skånevik.
Foto: Irene Mæland Haraldsen
I gang med å skapa trivsel
Utebassenget i Skånevik er i ferd med å bli ein realitet, og like etter årets påskefeiring var unnagjort starta endeleg gravearbeidet på tomta der badeanlegget er planlagt.
Planane er klare, det meste av finansieringa er på plass og dugnadsviljen er på topp. Til og med den vesle gule badeanda, som er Sjøkanten Trivsel sitt offisielle varemerke, er trykt på små klistermerke og klar for å bli delt ut til store og små badegjester som truleg vil få sin første dukkert i det nye bassenget når det stundar mot vår neste år.
Eigentleg var håpet å få utebassenget klart til årets sommarsesong, men av ulike grunnar har det tatt litt lengre tid enn tidlegare planlagt å få realisert anlegget mellom hotellet og skulen.
— Me hadde håpt på denne sommaren, men papirarbeid og prosjektering har tatt tid. Det er litt tidleg å seia kva tid det opnar, men mest realistisk er påske neste år, seier leiar i Sjøkanten Trivsel, Heidi Wannberg.
