Bak prosjektet står Gralls Eiendom AS, Kirsten Hebnes, Carsten Hebnes Andreasen og Edvard Tjelmeland som er grunneigarar på det 12,6 dekar store området som no er detaljregulert. Planen som har vore på høyring, kjem truleg opp for politisk handsaming i kommunestyret i mai. Det er Prosjektil Areal AS som har laga planen på vegner av grunneigarane.
Gralls Eiendom AS, som er eigd av betong-gründeren Erik Gravelsæter og kona Toril Gravelsæter, eig den største delen av planarealet, som ligg lengst vest i Sæbøvikjo, om lag 600 meter vest frå Etne sentrum.
Det var opphavleg OMG Invest AS, eigd av Ole Martin Grindheim, som fram til i fjor sat på eigedommen som utgjer brorparten av området i reguleringsplanen. Grindheim, som driv Etne Auto AS, hadde lakkeringsverkstad og lager i den gamle bygningen, som opphavleg var bygd på 1960-talet for å husa sagbruk og trelastverksemd.
