Har nærare 300.000 planter under tak
Han overtok planteskulen frå far sin for snart ti år sidan og har gradvis utvida drifta. I dag har Håkon Børre Kolltveit (42) og kona Silje (42) over 9 mål med planter under tak og fleire drivhus under planlegging.
Ved Stevi Planteskule i Øvre Vats står drivhusa smekkfulle med grøne vekstar. Alle laga av små stiklingar frå gartneriet og drivne fram til salsklare planter for hagesenter og planteskular over heile Sør-Noreg opp til Trøndelag. Produksjon av vintergrøne planter har vore planteskulen sin spesialitet sidan grunnleggjar og gartnar Reidar Kolltveit (79) flytta gartneriverksemda frå Danmark til heimlandet og kjøpte eigedomen på Knapphus i 1969. I 1970 bygde han sitt første drivhus og dreiv gartneriet fram til sonen overtok i 2012.
— Far byrja i Danmark der han dreiv med produksjon av ungplanter. Eigentleg skulle bedrifta hatt namnet Kolltveits Planteskule, men danskane klarte ikkje å uttala namnet. Då blei det Stevi, som kjem av stadsgrøne og vidarekulturplanter, fortel Håkon Børre Kolltveit som i dag står som eigar av bedrifta.
Driv i lag
