Grannar blant opplagsvinnarane

Lokalavisene er ei svært viktig informasjonskjelde for innbyggjarane også når korona-pandemien går mot slutten. Opplagstala går opp og folk les lokalavisa si både på nett og papir. Det viser ferske opplagstal frå LLA og MBL i dag. Grannar er blant lokalavisene i regionen med størst auke i opplaget, viser oversikten frå andre halvår 2020 til første halvår 2021.

Avisene tilknytt Landslaget for lokalaviser (LLA) aukar samla med 0,53 prosent, skriv organisasjonen i ei pressemelding. Over 60 prosent av LLA-avisenes opplag er komplett-abonnement. På den måten får lesarane tilgang til journalistikken og annonsane både på nett og papir. Nesten 30 prosent av abonnentane er heildigitale.

LLA-avisene sitt samla opplag er nå 358.139. Det er LLA sin generalsekretær, Tomas Bruvik, godt nøgd med.