Bygg og bu
Gjorde skule om til draumehus
At Edvin Jordal og Anna Litlabø endeleg kan byrja nedteljinga til innflyttingsdagen, er nesten ikkje til å tru. 7. mars i fjor starta dei nedrivinga av gamledelen, og rett over påske satsar dei på innflytting. Skulen er ikkje lenger ein skule – men ein heim.
Det er gjenklang i det nye kjøkkenrommet på gamle Rygg skule i Etne, men snart vil rommet og veggene fyllast av møblement og dekor som skal pryda den nye heimen til familien som om ikkje lenge tel seks personar. For Anna Litlabø (31) og Edvin Jordal (31) er det nedteljing, for det siste året har vore eit travelt og tøft år.
— Hadde eg visst kva eg gjekk til, er eg usikker på om eg hadde hatt mot til å ta fatt på det heile, seier Anna og stryk seg lett over magen.
Der inne, i den så smått bulande magen, ligg tilskot nummer fire i barneflokken som ser dagens lys til sommaren. Dei tre andre barna, Julian (snart 9), Sofia (5) og Nora (snart 3) gler seg veldig til å få større boltreplass i det nye huset, inkludert eigen gymsal, ekte utandørs fotballbane, og stor tomt med tilhøyrande reilestativ.
