Funnen etter 62 år

Ein sommardag for 63 år sidan var den 75 år gamle pensjonisten Johannes Hovland, som då hadde busett seg i Vikedal, ein tur i skogen ved Opsal. Han hadde fått lov av grunneigaren til å hogga seg litt ved til eige bruk, og var i gang med kvistinga av trestokkane då klokka hans smatt ut av lomma på vesten. Hovland leita og leita, men lommeuret var ikkje å finna. Det hadde funne vegen ned blant lauvverk og kvistar, og lagt seg godt til rette. Der skulle det bli liggjande i over 60 år.

— Hovland leita mykje etter klokka si. Han endevendte grunnen der klokka forsvann, fortel 81 år gamle Bjørn Grimås som var i tenåra då klokka forsvann.

— Hovland tok seg ut husved på garden til far min og mista klokka då han kvista stokkane. Eg var ikkje med i skogen då det skjedde, men fekk høyra mykje om det. Han snakka mykje om klokka, minnest Grimås.