Fleire vestlandsmedium går inn i Amedia
Mediekonsernet Amedia tek over Avisa Hordaland på Voss, Vaksdalposten og Hordaland Trykk og Distribusjon.
Det er krevjande tider i mediemarknaden om dagen. Då er det vanskeleg å stå åleine som ansvarleg eigar, seier styreleiar Ida T. Sætersdal i Avisa Hordaland. Avisa har hatt samarbeidsavtalar med Amedia i fleire år, og er glad for at valet av ny eigar fall på dei.
– Når eigarane vår har valt å trekkje seg etter ein 140 år lang eigarskap var det viktig for dei å finne ein kjøpar som kan bere tradisjonen vidare på ein trygg og god måte, seier Sætersdal i ei pressemelding.
Både Hordaland og Vaksdalposten har vore partnaraviser i Amedia sidan 2021. Amedias regiondirektør Svein Atle Huus seier at konsernet er godt kjent med drifta i dei to avisene og gler seg til å jobbe tettare saman framover.
I 2022 la Amedia ned trykkeriet sitt i Førde og flytta oppdraga til Hordaland Trykk og Distribusjon på Voss. No skal trykkeriet bli tettare integrert med Amedias andre trykkeriverksemd i landet.
