Kongebesøket
Fekk eit hjarteleg gjensyn med kongen
Blant æresgjestene under kongebesøket i Vindafjord var fem personar som tidlegare har motteke kongeleg påskjønning. I dag fekk dei igjen helsa på kongen.
På fremste rekkje like ved kongetribunen har Ivar Leonard Krakk (77) , Sigrun Thormodsæter (76), Thomas Finnvik (86), Sverre Georg Vågen (87) og Harald Magne Hustoft (86) fått plass. Alle har dei tidlegare mottatt Kongens Fortenestemedalje og i dag får dei igjen møta kongen. Ein etter handhelsar dei på kongen og dronninga før det kongelege følgjet avsluttar besøket i Ølen. Men noko lang samtale blei det ikkje tid til.
— Me hadde betre tid sist me helsa på kongen, seier dei og smiler.
Annonse
— Alltid stas
Sjølv om dei berre fekk eit par minutt med kongen og dronninga denne torsdagen var dei stornøgd med dagen.
— Dette har vore ein veldig fin dag. Det var veldig kjekt å helsa på dei, seier Sigrun Thormodsæter som i 2010 mottok Kongens Fortenestemedalje etter lang og tru teneste som husmor ved Brandøy leirplass.
— Det er alltid stas å treffa kongen, skyt Tomas Finnvik inn.
Annonse
Uventa heider
Den første som mottok Kongens Forteneste medalje var Ivar Leonard Krakk. Han fekk påskjønninga i 2001 for sin 40 år lange innsats ved Skjold Trevare.
Harald Magne Hustoft og Sverre Georg Vågen blei heidra med medalje i 2008. Hustoft for 53 år hjå same arbeidsgjevar, Sauda Forbrukslag/Nortura og for sin innsats over normalt for bøndene, medan Vågen vart heidra for lang og tru teneste som forkynnar i Norges Samemisjon, songar og musikar, og for sitt frivillige arbeid i sokneråd, bedehus- og skulestyre.
Tomas Finnvik fekk si kongelege påskjønning i 2012 for sitt frivillige arbeid gjennom heile livet innan kultur, lokalhistorie og kyrkje. Finnvik har også vore aktiv i sogelag, han har publisert artiklar i lokalhistoriske blad og bygdebøker og vor foredragshaldar og kåsør. Han var også med å starta lokalavisa Vindafjordingen, nå Grannar.
— Det var veldig uventa å få fortenestemedaljen, seier Finnvik.
