Fann sitt paradis i Skånevik

Med ei fire mål stor tomt, eit stort hus med basseng og hagestove, ein stor hage med drivhus, kjøkkenhage og nausttomt ved sjøen, står eigedomen i Skånevik i stor kontrast til rekkehuset i byen Katwijk i provinsen Sør-Holland i Nederland. Det vesle landet vest i Europa er eitt av landa i verda som har størst befolkningstettleik, og folk er vane med å bu tett. For familien Kuijt opna det seg ei ny verd då dei flytta til vesle Skånevik.

— Me budde i ein landsby med 77.000 innbyggjarar og hadde ei tomt på 225 kvadratmeter. Den var veldig stor. Og her har me rundt fire mål, smiler ekteparet Dirk-Jan (40) og Esther (38) Kuijt.

Ferieturar

Huset i Skånevik kjøpte dei usett etter å ha besøkt bygda eit par gonger sommarstid.

— Me har vore på ferie i Noreg i mange år på rad. I 2019 køyrde me til Vestlandet fordi det var meldt fint vêr der. Me køyrde forbi Tungesvik Gard og sette opp telt. Det er ein fantastisk plass. Året etter reiste me tilbake og sette opp teltet i tre veker. Den sommaren bestemte me oss for å flytta. Me kjøpte huset her i 2021. Me fekk selt og kjøpt nytt i løpet av ei veke, seier dei.

I Skånevik har ekteparet og dei tre borna Gert (12), Elise (10) og Jolijn (10) funne seg godt til rette. Far i huset har tatt jobben som kommersiell leiar med seg til sin nye heimstad, og Esther, som tidlegare dreiv heimebarnehage, har fått seg jobb på skulen i Etne.

— Me har funne vår plass her, og barna har fått livet sitt her, seier Esther.

Oppussing

Etter at familien på fem flytta til Skogavikvegen, har dei jobba jamt og trutt med å setja sitt eige preg på både hus og hage. Huset er pussa opp innvendig med mellom anna nytt kjøkken og nye golv. Utvendig har dei skifta ein del vindauge, bytt ut litt kledning, friska opp husfargen med ny maling og montert solceller på taket. Bassenget som den tidlegare eigaren anla i eit tilbygg til huset, har vore i flittig bruk fram til nyleg, men med mykje dugnadsarbeid på det nye utebassenget i Skånevik, har bassenget heime ikkje blitt prioritert.

— Me har pussa opp alle rom og har gjort alt sjølv, seier Dirk-Jan.

Med ein fleire mål stor hage er moglegheitene mange. Ekteparet er svært interesserte i dyrking av frukt og grønsaker og har sett av delar av tomta til kjøkkenhage og drivhus. Drivhuset har dei bygd sjølv av gamle vindauge på tomta der det tidlegare stod eit uthus, og i kjøkkenhagen har dei fylt på med grøderik matjord og kompost frå eigen hushaldning for å få plantene til å trivast.

— Me er interesserte i dyrking, seier Esther og viser fram det store drivhuset der det bugnar av solmodne tomatar, agurk og paprika.

Ullgriser

Då ekteparet frå Nederland overtok eigedomen i Skånevik, blei dei møtt av den svartelista planta parkslirekne, som hadde breidd seg utover delar av tomta. Parkslirekne er nesten umogleg å bli kvitt dersom ho får fotfeste og er rekna som ein av dei verste ugrasartane i verda. Men etter fleire år med hardt ryddearbeid og med god hjelp av ein liten flokk ullgriser, som et både blad og røter, har dei hageglade huseigarane endeleg fått bukt med den gjenstridige planta.

— Det var som ein skog. Me kjøpte tre ullgriser for å få bukt med planta. No skal dei få eta til hausten før dei blir slakta. Til våren får me nye, seier Dirk-Jan, og har planar om å invitera naboar og vener på stor grillfest med ullgris på menyen når dei glupske grisene har gjort jobben sin.

Vidare planar

Etter tre år med hardt arbeid både inne og ute, er det driftige ekteparet langt frå ferdige. Planane for eigedomen er mange, og idear om nye prosjekt dukkar stadig opp.

— Me ønskjer å setja opp ein gapahuk, byggja ut garasjen med ein liten verkstad, byggja ny utestove og setja opp nytt gjerde. Og så står det litt maling igjen. Me har mange planar, avsluttar Esther og Dirk-Jan.