Etterlyser tiltak mot flaum

Fredag skin sola igjen over Nedre Teigen i Etne og vassmassane som fann vegen inn i hagar og under krypkjellerar då uvêret Jakob herja over Vestlandet har trekt seg tilbake. Men torsdag såg det heilt annleis ut langs Prestabekken. På eigedomen til Geir Asbjørn Molland stod det meste av hagen under vatn, og i nabohuset der Egil Jørgensen held hus trengde vatnet heilt inn i krypkjellaren.

— Det var rundt 40 til 50 centimeter vatn i krypkjellaren, seier Egil Jørgensen.

Det er ikkje første gong at bebuarane i området opplever flaum.

— To til tre gonger i året er vanleg, seier han.

Ber om tiltak

Prestabekken har vore ei utfordring i mange år, men ekstra ille blei det etter at eit vassrøyr frå Fitje byggefelt blei ført ut i bekken. Det fører til at den flaumutsette bekken blir ekstra belasta med vatn og hindrar at vatnet som kjem rennande nedover får fritt utløp.

— Når dette vatnet kjem ned aukar det i bekken. Vatnet frå røyret lagar ein terskel, forklarar Geir Asbjørn Molland og viser staden der røyret kjem ut i bekken.

— Røyret skulle kome ut lenger nede, seier han.

I tillegg til den ekstra belastninga vatnet frå byggefeltet utgjer på vassføringa i bekken, dukkar det opp ei anna utfordring litt lenger nede i bekken. Fitja bru, som går over Strondavegen, er så låg at ved stor vassføring verkar brua som ein propp.

— Brua har for liten opning og eit bru-kar som er vinkla feil. Det blir ein propp, seier dei to karane.

Når det i enkelte tilfelle oppstår springflo samstundes med flaum blir det ekstra ille.

— Når det kjem springflo får ikkje vatnet renna ut. Då kjem vatnet inn i huset, seier Jan Vinje som eig to hus i nærleiken av bekkeutløpet.

Springflo er det ikkje råd å gjera noko med, men tiltak som å gjera utløpet breiare og endra utløpet frå byggefeltet meiner naboane der er mogleg å fiksa opp i.

Overløp

Prestabekken renn parallelt med Etneelva og eit tiltak som kan betra på flaumrisikoen kan vera å laga eit overløp lenger oppe i bekken.

— Eit overløp til Etneelva ville tatt toppen. Det ville vore til nytte for heile deltaet, seier Vinje.

Flaum i Prestabekken har vore eit tema i over 30 år, og naboane har fleire gonger tatt kontakt med kommunen i håp om å få hjelp. Enn så lenge har dei ikkje fått noko respons.

— Me saknar tilbakemelding. Me får aldri tilbakemelding om dei jobbar med saka, seier naboane i Nedre Teigen.

Ordførar Mette Heidi Bergsvåg Ekrheim kjenner til problemet med flaum i Prestabekken, men kan ikkje gje noko lovnad om det vil bli gjort noko med saka med det første.

— Me har ingen konkrete planar. Ein gong på 90-talet var det eit prosjekt på gang med ein kulvert over bøen, men den gong stoppa det. Eg kjenner ikkje til at det har vore oppe igjen. Og eg veit det har vore sett på å grava eit djupare bekkefar, seier ordføraren og ser ikkje bort frå at det kan vera på sin plass å få til ein dialog mellom grunneigarar og kommunen for å sjå nærmare på kva som kan gjerast.

— Det kan vera lurt at me set oss saman i lag for å sjå på dette og finna løysingar. Det er tilskotsordningar ein kan søkja på, seier ho.