Ein av skodespelarane i Dyreparken er Mathias Høyland frå Etne, i rolla som Mikkel Rev.
Etnebu er skodespelar i Dyreparken
Mathias Høyland (22) brukar sommaren på å spela Mikkel Rev i Dyreparken. Med opptil sju førestillingar om dagen, har etnebuen ein travel kvardag.
Skodespelet går føre seg i ein skog inne i Dyreparken. Der køyrer tre forskjellige tog med barn og vaksne rundt, for å oppleva dyra frå Thorbjørn Egners univers på vegen.
– Det er ein draum som går i oppfylling, og veldig stas å vera med på dette skodespelet. Eg er veldig glad i Egner-universet, og høyrde mykje på Hakkebakkeskogen på lydbok då eg var liten, fortel han.
Han byrjar dagen i skogen, med oppvarming av både kropp og stemme, før turen går vidare til kostyme og sminke. Der blir etnebuen Mathias Høyland til Mikkel Rev.
