Frå årsskiftet må du vera 16 år gammal for å få kjøpe energidrikk
Heiko Junge
Energidrikk, russebuss og pensjon – dette skjer i 2026
Frå nyttår er det forbode å røyka med barn i bilen og på leikeplassar. Du må vera 16 år for å kjøpa energidrikk, men kan jobba til du fyller 72 år. Her er lover og reglar som trer i kraft 1. januar.
No blir det 16 års aldersgrense for kjøp av energidrikk. Aldersgrensa gjeld òg i kantiner, på automatar, på festivalar og på idrettsarrangement. Om ein kjøper på nettet, så skal alderen sjekkast før ein får utlevert vara.
Nokon har lurt på kva som skjer viss til dømes foreldre kjøper til eit bursdagsselskap eller har energidrikk heime.
– Regelverket gjeld for verksemder som sel energidrikk og dekkjer ikkje det som er såkalla «aktivitet i privat øyemed», fortel seksjonssjef Marius Kallerud Beck som jobbar i seksjon for kjemisk mattryggleik i Mattilsynet.
