Dronefoto av fjellet ved Hesjabakkmyrane. Tunnelen skal gå inn i fjellet til venstre.
FOTO: STATENS VEGVESEN
E134: No er milliardkontrakten lyst ut
Statens vegvesen lyste tysdag ut kontrakten for bygginga av den nye Røldalstunnelen på E134.
– Vi er svært glade for å endeleg komme i gang med ny Røldalstunnel, og det er ein milepæl at kontrakten no kjem ut i marknaden. Dette er eit prosjekt mange har venta lenge på, og som både vil komme privatbilistar og tungtransportnæringa til gode. E134 er ein av hovudsambanda mellom aust og vest, og ny tunnel vil gi tryggare veg og kortare køyretid, forklarer prosjektleiar Frode Lykkebø i ei pressemelding.
Totalentreprise
Kontrakten er ein totalentreprise som omfattar prosjektering og bygging av eitløps-tunnel med tilknyting mellom Seljestad og Røldal.
Kontrakten har ein verdi på 2,5 milliardar ekskl. mva og omfattar i tillegg til tunnel på 12,4 kilometer ein 1,7 kilometer lang ny veg i dagen på Liamyrane ved Røldal, 1,2 km ny veg i dagen på Seljestad, samt gang- og sykkelveg på cirka 700 meter og diverse konstruksjonar i tilknyting til veganlegget.
Kontraheringsprosessen blir gjennomført med prekvalifisering og forhandling, og kontrakten skal etter planen inngås i løpet av våren 2025. Vegopning skal etter planen skje i 2031.
Førebuande arbeid er i gang
På Seljestad er førebuande arbeid i gang. her skal ei mindre bru rivast for å legge til rette for ei 15,5 meter lang spennarmert betongbru. Brua som skal byggast skal gje tilgang til det som blir Røldalstunnelen sitt riggområde. Denne kontrakten er det Etne-selskapet Br. Flatebø AS som har fått.
Den nye parsellen på E134 mellom Røldal og Seljestad vil kutte køyrelengda med 6,4 km og redusere reisetida med om lag 18 minutt for tungtrafikk og 12 minutt for personbilar. Prosjektet erstattar dagens Røldalstunnel og Seljestadtunnel, og eliminerer dei bratte og svingete vegane i Håradalen, som ofte skapar problem for tungtrafikken om vinteren.
