Drøymer du om å starte næring i eit gammalt hus?

Å starte næring i gamle og verna hus er utfordrande. Riksantikvarens nye rettleiar skal gjere prosessen enklare.

Når ein skal etablere ny næring i eit hus som er verna, kan det vere vanskeleg å vite kva for myndigheiter som må involverast når, kva ein må søkje om og korleis ein kan få hjelp. Ein nyutvikla rettleiar frå Riksantikvaren skal både gi ei overordna oversikt over prosessen og råd om ting dei som søkjer bør tenkje på under planlegginga.

– Vern gjennom bruk er den beste måten å ta vare på kulturmiljø. No gjer vi det lettare for kulturarv-gründerar og andre som ønskjer å ta i bruk kulturminne. Med ein ny rettleiar vil dei få hjelp til å starte prosjekta sine, seier klima- og miljøminister Andreas Bjelland Eriksen i ei pressemelding.