Brannmannskap i distrikta opplever meir stress enn i dei store byane.
Illustrasjonsfoto: Gorm Kallestad / NTB / NPK
Det kan vere ekstra belastande å vere brannmann på bygda
Ny forsking viser at brannvesenet i Noreg opplever mange av dei same stressfaktorane i arbeidet, men for dei som jobbar i distrikta, kan det opplevast ekstra tungt.
– Det unike for brannkonstablar i rurale område og mindre kommunar er at dei ofte kjenner dei som er involverte i ei hending eller dei pårørande. Når det er små forhold, er det større sjanse for at du blir påmint hendingar som har vore krevjande, seier stipendiat ved Universitetet i Innlandet, Marthe Maritsdatter Granlund, i ei pressemelding.
Granlund har intervjua ei rekkje brannfolk over heile Innlandet for å finne ut om det er skilnad på stresset dei opplever samanlikna med brannmannskap i større byar.
I forskinga si avdekte Granlund at dei store avstandane i mange av kommunane ute i distriktet påverkar stressopplevinga for brannmannskapa.
