Det er ein dårleg idé å hive juletreet i peisen

– Det kan vere svært farleg. Når ein fyller opp omnen med granbar, oppstår det ein umiddelbar og intens varmeutvikling som kan føre til pipebrann og utslepp av farlege gassar, seier Sintef-forskar, Morten Seljeskog i ei pressemelding.

Seljeskog forklarar at nålene frå bartre har eit lag med voks og eit innvendig nettverk av kanalar full av kvae. Begge desse er svært brennbare og resulterer i høge konsentrasjonar av uforbrunne hydrokarbon, partiklar, karbonmonoksid (CO), ammoniakk (NH3), hydrogenfluorid (HF), formaldehyd (CHOH) og hydrogencyanid (HCN).

– Desse er farlege. Spesielt hydrogencyanid. Høge konsentrasjonar av desse gassane kan vere dødelege, åtvarar forskaren.