Blåbær-entusiasten

I hagen til blåbærdyrkar Alfred Mitchell på Bjoa bognar det av bær. Store, blå smakfulle antioksidantbomber heng tett i tett på greinene i dei meterhøge buskane i Blåbærhagen og berre og ventar på å bli plukka. Men først trengst ennå nokre dagar med sol og varme før bæra har fått den rette blåfargen.

— Bæra er ikkje modne før heile bæret er blått, seier Alfred Mitchell og viser fram eit bær som for eit utrent auge ser heilt fint ut.

— Området her nede ved stilken skal også vera heilt blått, men nå nærmar det seg. Bæra treng sol og varme for å modnast, seier han og håpar vêret vil spela på lag den siste tida før innhausting.