Fleire nye prosjekt har som mål å styrkje forskinga på kvinnehelse. F.v. professor Stian Knappskog, professor Line Bjørge, professor Marte Helene Bjørk og professor Eystein Sverre Husebye.
Foto: Paul André Sommerfeldt/ Universitetet i Bergen
Bergensarane satsar 50 millionar på kvinnehelse-forsking
Prosjekta spenner frå forsking på eggstokkreft til mutasjonar i fosterlivet, tidleg overgangsalder og forbetra behandling av epilepsi.
Utgreiinga frå kvinnehelseutvalet frå 2023 peikar på ei rekke kunnskapshol når det gjeld kvinnehelse. Mellom anna viser det seg at det er fleire sjukdommar som har ulike symptom hos kvinner og menn, at behandling ofte har ulik effekt avhengig av kjønn, og at risikofaktorane som påverkar sjukdomsutbrot varierer mellom kvinner og menn.
Trond Mohn forskingsstifting har no, saman med Det medisinske fakultetet ved Universitetet i Bergen (UiB) og Helse Bergen (HB), investert 50 millionar kroner i ei satsing som skal bidra til å svare på viktige forskingsspørsmål innan kvinnehelse. Trond Mohn forskingsstifting bidreg med 24 millionar kroner, og UiB og HB bidreg saman med tilsvarande.
