Åtvarar mot stor skogbrannfare

— Eg er normalt ikkje uroa, og meiner me ikkje skal ropa varsku kvar gong det er tørt i terrenget. Det er vanlegvis handterbart – men no er det ein kombinasjon som er farleg, seier brannsjef Dag Botnen i Haugaland Brann og Redning IKS i ei pressemelding tysdag kveld.

Etter ein lang tørkeperiode får me no ein vêrtype som kan gi svært rask brannspreiing: stiv kuling med storm i kasta, sterk soloppvarming og låg luftfukt. Dette er ein særleg uheldig kombinasjon.

— Dersom det oppstår brann under slike tilhøve, kan han utvikla seg eksplosivt – og det kan bli svært vanskeleg å få kontroll. Me har sett kor raskt det kan gå gale – både i Noreg og internasjonalt – under liknande forhold. Dette er ikkje tida for å ta sjansar, seier Botnen.