Ap-leiaren på besøk
Leiar i Arbeiderpartiet, Jonas Gahr Støre skal på reise i Rogaland og Hordaland. Etter innspel frå følgjarar på Facebook legg han turen innom Omega AS og Skånevik Fjordhotell
Onsdag vil Ap sin statsministerkandidat besøka Haugalandet. Rådgjevar for Jonas Gahr Støre, Camilla Ryste opplyser til Grannar at reisa er planlagt etter innspel frå folk som fylgjer han på Facebook.
— Gahr Støre la ut ei melding om reisa der han bad om forslag til stader han kunne besøka og det kom inn rundt 350 forslag, fortel Ryste.
Annonse
Turen i distriktet startar i Haugesund onsdag, før delegasjonen drar til Sauda. Om ettermiddagen blir det stopp hos Omega AS i Ølensvåg før Ap-leiaren køyrer til Skånevik.
I Skånevik er det lagt opp til ei ope møte onsdag kveld om korleis saman skapa framtidas arbeidsplassar. Det er hotellsjef Inger Karin Larsen som kom med forslag til Ap-leiaren om å legga turen til bygda.
Gahr Støre overnattar på hotellet før han neste dag drar til Husnes og Ølve i Kvinnherad, og deretter til Voss.
