50 år som avløysar

— Eg trivst i yrket, seier Knut Leknes og smiler.

Den spreke 71-åringen har nettopp vore ein tur innom grisehuset på garden til Sjur Aakra for å sjå til at dei nyfødde grisungane har det bra, og nå set han kursen mot reiskapshuset der potetene ligg klar til sortering. Knut veit nøyaktig kva som skal gjerast for å halda hjula i gang på garden til griseprodusenten og potetbonden på Mo i Etne og denne dagen er ikkje noko unntak.

Ein vanleg arbeidsdag startar som regel med eit besøk i grisehuset tidleg om morgonen. Då tek Knut seg ein runde for å sjå at alt står bra til med grisene, måkar skit og legg ut nytt strø. Grisebonden på Mo alar opp smågris, i tillegg til å ha sau, nokre slaktegris og fleire mål potetåker, og med rundt 40 purker som føder i snitt 15 ungar kvar kan det bli livleg i fjøset til tider. På det meste har Sjur over 1400 smågriser å ta hand om og då kan det vera godt å ha ei hjelpande hand.