Godt forsvar sikra heimesiger

Vats/Skjoldar/Vik spelte sin nest siste heimekamp for året, då Haugar vitja Hatteland Stadion torsdag kveld. Heimelaget gjekk defensivt ut, og eit omstendeleg bortelag greidde ikkje å brodere seg igjennom det bastante forsvaret. Vertane kom heller ikkje til dei store sjansane, så laga gjekk mållause inn i garderoben til pause.

Det opna seg noko meir opp i den andre omgangen, og Vats/Skjoldar/Vik kom på fleire overgangar. Etter omlag timen knuste Morten Frøland inn leiarmålet frå 30 meter. Ballen gjekk som eit prosjektil inn bak Haugar-målvakta. Ti minuttar seinare auka Daniel Jansen til 2-0 etter godt spel, og sigeren var eit faktum.

Sigeren smakte tydeleg godt for heimelaget, som har hatt ein noko tung sesong. Nå ventar bortekamp mot opprykksjagande Etne i neste runde, torsdag om ei veke. Etter trepoengaren mot Haugar har Vats/Skjoldar/Vik nå åtte poeng, og legg seg litt under midten på tabellen.