Går frå siger til siger

Det byrjar å bli ein vane for heimepublikumet i Etne at det endar med siger når A-laget spelar kamp i 5. divisjon. Berre eitt tap på åtte kampar i haust, resten har laget vunne. Alle dei fire heimekampane har gjeve full pott, mange skodelystne på den nye tribuna, og i alt atten skåringar.

Fredag kveld var botnlaget Kolnes på vitjing, og sjølv om ikkje heimelaget fyrte på alle sylinderane, vart det ein trygg og god 3-0 siger. Som i førre heimekamp, vart det hattrick på Sigbjørn Siggi» Sævereid. Han stod for alle skåringane i kampen, to av dei etter retur på straffespark. Sævereid var frampå både etter Bjørnar Aastvedt sin straffe i første omgang, og etter Rune Torstenbø sin i den andre omgangen. Dermed redda Kolnes sin målvakt til inga nytte. Siggi» krona kveldens hattrick med å kjempa inn eit hjørnespark etter drøye timen.

Kolnes hadde lite å komma med i kampen, men dei låg lavt i bana, og kjempa for å begrense nederlaget.