Vegval engasjerer

— Me i Vikebygd er kjempepositive til at det skal skje noko på Dommersnes, men det må ivareta naturen, sa Lene Bjerga.

Folkemøtet blei arrangert i samarbeid mellom Vikingstad AS og foreininga Bevar Ålfjordens Perle, som jobbar mot planane om å utvikle industriområdet på Dommersnes med sikte på serieproduksjon til havvindnæringa gjennom selskapet Windafjord Port, som Vindafjord kommune og Westcon eig kvar sin halvpart av. Ein reguleringsplan for over 500 dekar er på høyring fram til 22. april. Bjerga synest det er mykje negativt med dette prosjektet, eksempelvis støy i anleggsfasen, og ser ikkje noko positivt med det.

Ekteparet May Britt og Kjetil Vikingstad står bak selskapet Vikingstad AS, og har vore hytteeigarar i Vikebygd i over 20 år. Dei er kritiske til Windafjord Port-prosjektet, og har utarbeidd ein moglegheitsstudie om mogleg satsing på turisme og mindre industriverksemd som eit alternativ.

— Det dei foreslår, er eit kjempealternativ, sa Bjerga.

Etter møtet utdjupa ho dette med at Vikingstad-prosjektet tek vare på naturen, som var ein avgjerande faktor for at ho flytta til Vikebygd for 23 år sidan.

Skapte medviten

Planane til Vikingstad AS blei presenterte med ein PowerPoint-framvising av May Britt og Kjetil Vikingstad. Selskapet har støtta Bevar Ålfjordens Perle ved å bidra til arbeidet i foreininga, samt gjeve økonomisk støtte. Dei har sendt inn merknadar og klagar på ulike stadium av Windafjord Port si satsing i 2023 og 2024.

— Me har ikkje fått medhald i nokon av klagene, men me meiner klagene har vore med på å auke medvitet og motstanden kring saka, sa Kjetil Vikingstad.

I oktober 2024 kjøpte Vikingstad AS ein 2,2 dekar stor hytteeigedom i Brunnavik, som ligg innanfor fase 2-området. Sidan har dei utarbeidd ein moglegheitsstudie for alternativ næringsutvikling i Vikebygd. I januar 2025 hadde dei møte med ordførar Ole Johan Vierdal (Sp) og sentrale aktørar i administrasjonen, der dei fekk presentera meiningane sine og ein førebels moglegheitsstudie.

— Kommunen var lyttande, men verka låst til strategien til Westcon for vidare utvikling av Dommersnes, sa Kjetil Vikingstad.

Han og kona ber om at reguleringsplanen som er på høyring ikkje blir godkjend, og grunnar det med at planen vil medføre store negative konsekvensar for Vikebygd og Ålfjorden. Utbyggingsplanane vil etter deira oppfatning få store følgjer for naturmangfald, landskap, klimagassutslepp, friluftsliv og folkehelse, og kan føre til redusert tilflytting og svekt satsing på reiseliv.

Gode høve for reiseliv

Moglegheitsstudien til Vikingstad AS belyser potensialet for ein alternativ veg for Vikebygd for utvikling av næring som tek omsyn til bygda, landskapet og naturen. Studien utforskar kva som er det unike med Vikebygd og kva bygda treng for å ta vare på og styrkje seg som ei meir attraktiv bygd for tilflytting, næringsetablering og som reisemål.

Vikebygd har etter ekteparet si oppfatning eit stort potensial for vidare utvikling av reiselivsnæringa. Dei viste til at trendane for framtidas reiseliv peikar mot meir berekraftig turisme, stillheit og rein natur.

— Bygda kan tilby det framtidas reiseliv etterspør: Flotte omgjevnader, god plass og moglegheiter for naturopplevingar og friluftsliv, sa Kjetil Vikingstad.

Eigedommen deira på Brunnavik ser dei som eit godt utgangspunkt for ein slik satsing. Dei forklarte at området kan leggjast til rette for mikrohytter med panoramautsikt over fjordlandskapet, samt attraktive opplevingar basert på lokale natur- og kulturverdiar.

Skisseplanen viser etablering av tre mikrohytter samt fem hytter i tillegg til eksisterande hytter. Det er føreslått naust i rekkje, ei mindre småbåthamn med moglegheit for drivstoffylling, samt badstove for utleige. Fellesområde kan etablerast i strandområdet med kaianlegg og grillplass. Kjetil Vikingstad fortalde at prosjektet i Brunnavik vil bety ei investering på 25 millionar kroner. Han ser for seg at om ein hadde fått til liknande prosjekt to–tre plassar i Vikebygd, kunne ein fått unge folk til å flytte til bygda.

Trur på tømmer

I tillegg til turistsatsing ser ekteparet potensial for utvikling av mindre næringsverksemd og småindustri i Vikebygd. Vikingstad AS har ein strategi om vidare satsing på biobrensel og utvikling av bioterminalar, og ønskjer å etablere ein ny HUB for aktivitet innan biobrensel på Vestlandet.

— Dommersnes kan vere ein aktuell lokasjon, og det eksisterande industriområdet eignar seg slik det ligg i dag. Vikingstad AS er i dialog med aktørar om etablering av ein Bio-HUB på Haugalandet, sa Kjetil Vikingstad.

Biobrensel er ei fornybar energikjelde som er basert på levande organismar. Biobrensel kan for eksempel vere ved, torv, treflis, brikettar, pellets, biodiesel, bioolje eller bioetanol. Fleire hadde spørsmål til ekteparet om korleis ei slik satsing i Vikebygd eventuelt vil bli. Kjetil Vikingstad sa at lagringa av tømmarstokkar ikkje vil vere sjenerande, og at aktiviteten ikkje ville laga stor støy. Tømmeret ville kome til Dommersnes på lastebilar og bli frakta med skip etter hogst.

To tankar i hovudet

Timinga for møtet var at både arealdelen av kommuneplanen og reguleringsplanen på Dommersnes har høyringsfrist 22. april. Styreleiar Jon Magne Svendsbøe i foreininga Bevar Ålfjordens Perle presenterte høyringssvaret til foreininga.

Svendsbøe sa at det var gjort grundige konsekvensutgreiingar i planen på nokre område, og trekte blant anna fram konklusjonen om at tiltaket vil ha stor negativ konsekvens for landskapet. Han sakna også nokre utgreiingar, eksempelvis kring påverknad på eigedomsverdiar.

Både folk som bur i Vikebygd og har tilknyting på andre måtar var på møtet. I samband med at ein møtedeltakar frå Sveio kom med eit innspel, reflekterte Svendsbøe over at politikarar i Sveio kommune, på andre sida av Ålfjorden, viser liten interesse for prosjektet. Dei fleste som tok ordet, var tydeleg negative til prosjektet til Windafjord Port. Rune Hetland ville heva perspektivet.

— Både dei som er for og mot, må ha to tankar i hovudet samtidig, sa Hetland.

Med det meinte han at folk, i tillegg til å jobba for sitt standpunkt, må bidra til eit best mogleg utfall for bygda om det ikkje går slik dei vil. Han oppfattar at fleirtalet av politikarane er ukritiske til prosjektet, og at ein bør få dei til å i alle fall bli litt kritiske og seia nei til dei verste ulempene for bygda.

Etter møtet signerte mange høyringsinnspelet til Bevar Ålfjordens Perle.

Grannar opplyser: Rune Hetland er styremedlem i Grannar AS. Grannar er politisk uavhengig. Redaksjonen står fritt og redaktøren åleine svarar for alle redaksjonelle vurderingar.

Rune Hetland vil at bygda skal få noko igjen for ei eventuell industrisatsing. FOTO: SVEIN-ERIK LARSEN