Ung fiskar lurte laksen
Spinnar, sluk, makk og floge. Vala var mange, men det var ein blank spinnar med raude prikkar som lurte laksen på snøret til Alexander Høyland i Etneelva.
—Eg har fiska veldig masse etter laks, men ikkje her i sone tre før. Dette er den andre laksen eg har fått i år, den fyrste fekk eg i Sørelva. Det er ofte der eg fiskar sidan bestefaren min eig der. Det er besten og oldefaren min som har fått meg interessert i laksefiske, ja og fleire andre i familien. Mange driv med det, fortel Alexander Høyland på tolv år. Etter å ha fått fisk set han seg solidarisk ned for å vente slik at nokon andre skal få sjansen til å få fisk. Kvoten er på to, og den må ein overhalda meiner han.
Sjølvplukka makk
Det er mange val innan reiskap for å få laksen på kroken. Og sjølv om dagens fangst var på ein spinnar, er den unge fiskaren glad i å bruke makk. Og makken grev han sjølv kring heimen på Osnes, noko oppdrettsmakk skal han ikkje ha.
