Tek omsyn til vipa

Vipebestanden er på veg ned her til lands. I følgje den frivillige naturvernorganisasjonen BirdLife Norge har talet på hekkande viper minka med 80 prosent dei siste tjue åra. Det har gitt vipa status som kritisk trua på den norske raudlista. For bonde og landbruksrådgjevar Alf Egil Vaula i Øvre Vats er vern om vipebestanden eit oppdrag han tek på alvor og kvart år set han inn tiltak heime på garden for å verna den vesle trekkfuglen. Vipene dukkar vanlegvis opp i slutten av februar og byrjinga av mars, og når tida nærmar seg finn den fugleglade bonden fram kikkerten for å sjekka om dei er på plass.

— Det er vanskeleg å finna reiar så eg brukar kikkert. Eit år leigde eg inn eit firma som hadde varmesøkande kamera i drone, men kikkert er best, seier han.

Somme gonger slår vipa seg ned i utkanten av bøen, men dersom den vel å byggja reir på dyrka mark må bonden passa ekstra godt på for å unngå skade på fugle og reir.