Trekkjer motsegn mot Dommersnes-plan

— Under føresetnad av at endringane presenterte i kommunen si oversending 17.02.2026 blir innarbeidde i planen, vurderer me at motsegnene er tilstrekkeleg imøtekome, skriv fylkesmiljøvernsjef Cathrine Stabel Eltervåg og plankoordinator Marita Skorpe Falnes i Statsforvaltaren i Rogaland i eit brev 3. mars.

Dei har nokre faglege råd som gjeld sikring av areal til, og metode for gjennomføring av tiltak knytt til Stemmevatnbekken, som dei rår Vindafjord kommune til å innarbeide.

Som følgje av at Statsforvaltaren trekk motsegner, kan Windafjord Port sitt forslag til ny reguleringsplan, utarbeidd av konsulentselskapet Norconsult, bli andregongsbehandla politisk. Einingsleiar Thomas Vestbø for areal og forvaltning i Vindafjord kommune opplyser at saka blir handsama i formannskapet 24. mars og i påfølgande kommunestyre i april. Vidare fortel han at saksdokumenta etter planen kjem på nettsida til kommunen i løpet av dei neste dagane.