Ulovleg dumping

Både Audny Aasheim og naboane på Norheim i Etne er frustrerte over at folk dumpar søppel på eigedomane deira. På berre nokre få hundre meter er det tre stader lang E134 der det med jamne mellomrom er folk som stansar bilen for å dumpa alt mogleg. Men for ikkje lenge sidan fekk Aasheim tips frå naboen om at no var det verkeleg blitt ille, og då sjekka ho dette nærare.

— Eg ser ikkje denne dumpingplassen frå huset mitt, eller frå vegen. Då eg kom fram fekk eg sjokk. Det såg ikkje ut! Det låg ein heil haug med søppelsekker der, og dei fleste var fylt med brukt kattesand og katteskit. Du kan trygt seia det lukta vondt, seier Aasheim og legg til at ho blir både rasande og trist når folk forsøplar på denne måten.

Det er ikkje berre kattesand og skit som blir kasta, det er også anna søppel. Til dømes er det ikkje lenge sidan naboen fann eit heilt stovebord som var kasta på eigedomen sin.