Strålte på scena

Spente, små fjes kikkar fram gjennom sceneteppet. Salen er i ferd med å fyllast med publikum. Det blir fullt på premiera av Reisen til Julestjernen. Ekstra stolar må finnast fram.

— Det er på éin måte kjekt å grua seg litt og, seier Marie Rørtveit Rødne, Maren Heggebø og Maria Bjelland, som kjenner litt på sommarfuglane i magen. Dei spelar høvesvis Sonja, Ole og Petrine. Dei er erfarne og har vore med i Sandeid barne -og ungdomsteater i fleire år. For Marie er det fyrste gong ho har ei hovudrolle.

— Eg gruar meg litt til å synga solo, for eg syng ikkje til vanleg, seier Marie.