Solrikt og tidleg slått

— Graset kom fort då finvêret kom. Kvaliteten ser ut til å vera bra i år, med både tjukt og godt gras. Det blir rikeleg med fôr i år, konstaterer bonde Tor Dagfinn Helgevold i Sandeid nøgd og gjer seg klar til å ta fatt på årets første slåttonn.

På bøen står det meterhøge graset grønt og fint. I år kan han starta slåtten litt tidlegare enn vanleg, og han reknar med å ha slått av sine rundt 240 mål eit par veker før normalt.

— Slåtten er tidleg i år. Eg har alltid vore ferdig til St. Hans, men nå blir eg nok ferdig eit par veker før, seier han og håpar på gode forhold vidare utover sommaren.