Snart årsmøte: Framleis ingen ny leiar til Etne IL

Det hastar for Etne idrettslag. Om tre veker skal laget halda årsmøte, men framleis står leiarvervet i hovudstyret utan kandidat. Valnemnda har vore i kontakt med ei rekkje aktuelle personar, men har så langt ikkje lukkast med å få nokon til å ta på seg rolla. Avtroppande leiar Erling Bjarte Rullestad håpar likevel at nokon vil melda seg før årsmøtet 26. mars.

— Me ønskjer inderleg at nokon skal melda seg, og eg synest det er viktig å få fram at dette er eit ufarleg verv, seier Rullestad.

Sjølv har han vore leiar sidan 2020 og har til saman ti år bak seg i styret i Etne IL. I fjor haust flytta han til Stavanger og må dermed gi stafettpinnen vidare. Ifølgje Rullestad handlar vervet først og fremst om å leia styremøta og sørgja for at styret arbeider strukturert med administrative og økonomiske spørsmål. Dei ulike idrettsgruppene i laget har eigne styre, mens hovudstyret arbeider med dei overordna rammene for idrettslaget.