Rekordstor deltaking på motortreff
Til saman 140 bilar møtte opp i Ølen då Etne og Vindafjord Motorklubb arrangerte motortreff med konkurransar, premiering og kaffikos.
Det vrimla av glinsande stasbilar i Ølen sentrum laurdag. Aldri før har så mange møtt til motortreffet i regi av Etne og Vindafjord Motorklubb ,og deler av Sjoargata og området rundt Ølen Senter var fullpakka av bilar frå heile distriktet. Både bergensarar, vossingar, jærbuar og lokale bileigarar hadde pussa støv av favorittbilane sine denne solskinsdagen for å treffa andre bilentusiastar og kosa seg i sommarsola.
— Dette er rekord. Forrige rekord var i 2019 med 120 bilar. I dag er det over 140, seier leiar i Etne og Vindafjord Motorklubb, Egil Viker Jørgensen.
Koronasituasjonen har sett ein liten dempar på programmet, og den populære haiketuren med bilturar i sentrum er tatt ut av programmet. Men i løpet av dagen er det rikeleg med aktivitetar å delta på. Tre ulike konkurransar står på programmet og her kan deltakarane sikra seg både pokal og pengepremie.
