Rekorddeltaking og folkefest

Det var ei folkevandring til Skjold denne søndagen. Aldri før har arrangørane sett så mange løparar og trimmarar på startstreken. Totalt stilte 250 deltakarar – med 109 barn og 97 i hovudløpet. Det er ny rekord for arrangementet.

Vêret var like variert som deltakarane: sol, pøsregn, meir sol og til slutt litt overskya, før det begynte å pøsregna igjen. Men stemninga lét seg ikkje stoppa. På grasmatta på Skjold idrettsplass var det liv og røre med kiosksal, sponsorar og heiarop.

Mat, drikke og tribunehygge

Fleire sponsorar stilte opp for å gjera dagen til ei oppleving. Løparane fekk både juice, bananar, bollar og frukt. Publikum kunne kjøpa seg snop, pølser i brød, og fruktbeger, og på tribunane sat folk tørt under regnbyene.

Svein Haakull var konferansier og heldt folk oppdatert med humor og entusiasme. Han losa publikum og deltakarar gjennom både barneløp, kortdistansar og hovudløpet, og sørgde for god stemning.

Johaug fekk fart på dei yngste

Det store trekkplasteret i årets arrangement var Therese Johaug. Ho starta dagen med å varma opp dei yngste i barneløpet. Med leik, øvingar, hopping, rop og moro fekk ho ungane til å hiva seg med på både knebøyg, hopp og sprett, og ungane lét seg riva med, og viste stor entusiasme.

Johaug hadde god kontakt med dei små, og sjølv stilte ho til start i hovudløpet, men la ikkje skjul på at ho ikkje var i toppform. Ho ventar barn, og hadde i tillegg litt rusk i maskineriet», men blei likevel med i løpet og skapte stor begeistring blant publikum.

Konferansier Svein Haakull drog på smilebandet då han sa til dei frammøtte:

— Om nokon trur dei er klare for verdsmeisterskap berre fordi dei eventuelt slår Johaug i dag, så bør dei kanskje ta ein ekstra runde i tenkeboksen.

10 kilometer rundt vågen

Hovudløpet gjekk i ei løype på ti kilometer, rundt Haraldseidvågen og tilbake igjen til stadion. Løparane måtte gjennom både sol og regn, og halvvegs i løypa stod ekteparet Jone og Veronica Tveit i lag med fleire medhjelparar som hadde rigga til drikkestasjon for løparane. Her var også både heiagjeng, musikk og mikrofonrapportering direkte inn til stadion. Ein av løparane heva hendene i vêret då ho passerte heiagjengen, og utbraut:

– For ein nydeleg plass!

Liten løpar med stort smil

Blant dei mange som stilte til start i barneløpet, var Dina Mortveit. Ho sprang med stor iver og smilte breitt då ho passerte målstreken.

— Det var veldig kjekt å springa, sa Dina fornøgd.

Ekstra stas var det òg fordi dette var hennar siste søndag som to-åring. Neste søndag fyller ho nemleg tre år, og det var ho svært stolt av å fortelja.

På tribunane var det fullt, og publikum heia ivrig både på dei yngste og dei vaksne løparane, og mange frivillige bidrog til at alt gjekk som det skulle.

Miriam Rätz, Dina Rødde, Tilde Nesheim, og Ada Rørtveit sørgde for medaljeutdeling, slik at alle som var med fekk medalje.

Rekordtal og dugnadsinnsats

Leiar i hovudstyret, Nils Morten Dahl, kunne stadfesta dei gode tala.

— I dag har me sett ny deltakarrekord med totalt 250 deltakarar. 109 barn er ny rekord, og 97 i hovudløpet er òg ny rekord. Dette er kjempebra og veldig kjekt, sa Dahl.

Han peika på dugnadsinnsatsen som avgjerande.

— Me er heilt avhengige av folk som stiller opp. Me har løypevakter rundt alle tre løypene, barneløp, kortløype og hovudløpet, og totalt har me rundt 20 personar ute i traseane. I tillegg kjem dei som riggar, ordnar med kiosk, delar ut medaljar og set opp telt. Det ligg utruleg mange frivillige timar bak, sa Dahl.

Ung stjerne frå Haugesund

Den unge løpsstjerna var Othelie Stave-Wigene (14) frå Haugesund, som alt har markert seg som ein av Europas beste på sin alder. Ho blei mykje omtalt før start, og fleire hadde trua på at ho kunne utfordra dei vaksne.

— Eg høyrde rykte om at ho kanskje til og med kunne slå mannfolka, sa Nils Morten Dahl, før løpet.

Med Wigene, Johaug og mange sterke namn på startlista, blei det verkeleg spenning rundt årets hovudløp.